Hmong First Baptist of Milwaukee

Ua ntej tshaj, vim kuv hlub Vajtswv thiab txais yuav tus Vajtswv uas tau tuag theej kuv lub txhoj saum ntoo khaublig. Thiab tsuas yog Vajtswv tib leeg xwb thiab li hlub cov neeg muaj txim. Kuv knov Vajtswv hu kom ua Nws tes haujlwm, mus pab coj Hmoob txhua xeem los pe Vajtswv uas yog Ntsujplig.

Yam ob, kuv paub tseeb hais tias cov kwvtij ntseeg dab lub siab quajdhi tuav plig rawv rau qhov lawv nrhiav tsis tau ib hom kev ntseeg twg pab lawv tej ntsujplig kom dim lub ntujtxiag tebtsaus uas yog lub chaw hluavtaws kub nyhiab. Kuv thiaj muab tag nrho kuv txojsia pub rau Vajtswv siv, muab lub sijhawm tawm mus qhia lwm tus txog txoj kev dim subtawg subntsha los ntawm Yexus lub npe kom txhua tus los ua kevcai yug dua tshiab, thaum ntuj tag teb kawg, tej plig thiaj li tau rov mus cuag Vajtswv nyob ntuj Ceebtsheej.

Yam peb, kuv ua raws li Vajtswv txib kom ntau leej tau hnov Vajtswv txojlus thiab to-taub hais tias Tswv Yexus yog txojkev yog qhov tseeb thiab yog txojsia. Tsis muaj dua lwm txoj kev yuav mus cuag tau Vajtswv, tsuas yog los ntawm LeejTub mus xwb thiaj li mus tau (Yauhas 14:6).

Yam plaub, kuv hlub tshua txog ib tsoom kwvtij thiab nkaujmuam uas tseem nyob nyuaj siab ntsuav hauv Dab Ntxwgnyoog lub xibteg, Kuv xav kom txhua leej tau hnov Vajtswv txojlus thiab paub meej hais tias tsuas yog Vajtswv xwb thiaj li muaj hwjchim pab tau neeg dim txojkev ua dab ua qhev.

Yam tsib, kuv ntseeg hais tias txhua tus tibneeg Vajtswv tsim zoo ib yam tsis muaj kev sib cai xeem, tsis muaj ib tug neeg twg yug los ua tus tswv rau cov pojniam thiab minyuam. Yexus Khetos tibleeg xwb yog neeg txhua leej tus Tswv. Vim li no, kuv thiaj txaus siab tsa kom muaj pawg ntseeg Hmong First Baptist church ua Yexus lub cev txawm nyob rau lub nroog Milwaukee, Wisconsin xyoo 1982.

Pawg ntseeg twb tau txais koobhmoov nplua-mias thaum pib thawj hnub los lawm thiab tseem yuav tau txais koobhmoov mus ntau ntau tiam neeg ntxiv, yog tias cov coj thiab cov ntseeg txhua tus hwm Yexus Khetos ua Vajtswv thiab cia tus Ntsujplig dawb huv txoj haukev. Thov kom Vajtswv lub hwjchim ci ntsa iab tuaj rau nej txhua tus lub neej thiab foom koob hmoov rau sawvdaws.

X.F. Neejmais S. Vaj

Yog tus xibfwb pib thaib